आधुनिक युद्ध जित्न चिनियाँ सेनामा विशेष सैन्य युनिट (भिडियाे)

शिलापत्र संवाददाता सोमबार, वैशाख १७, २०८१

A+ A A-

आर्थिक विकास र समृद्धिसँगै विश्वको पहिलो शक्ति राष्ट्र बन्ने धुनमा रहेको चीनले सैन्यक्षेत्रलाई पनि निरन्तर आधुनिकीकरण गरिरहेको छ । पछिल्ला केही दशकदेखि सैन्य खर्चमा तीव्र वृद्धि गरिरहेको चीनले आधुनिक युद्धलाई मध्यनजर गर्दै सेनामा ठूलो फेरबदल गरेको छ ।

चीनले आफ्नो सेनामा एक दशकयताकै ठूलो बदलाव गर्दै नयाँ सैन्य युनिट तयार गर्ने घोषणा गरेको हो । जसलाई उसले इन्फरमेशन सपोर्ट फोर्स नाम दिएको छ । केन्द्रीय सैन्य आयोगका अध्यक्ष राष्ट्रपति सी चीनफिङसहित वरिष्ठ सैन्य अधिकारीहरूको उपस्थितिमा विशेष सैन्य युनिटको घोषणा गरिएको हो । राष्ट्रपति सीले सेनाको यो रणनीतिक एकाइको काम नेटवर्क इन्फरमेशन सिस्टमलाई बलियो बनाउनु भएको बताएका छन् ।

राष्ट्रपति सीले यो एकाइ वफादार र विश्वसनीय भएको सुनिश्चित गर्न पार्टीको आदेशलाई दृढताका साथ सुन्न र सेनाको पूर्ण नेतृत्वको सिद्धान्त तथा प्रणालीलाई लागू गर्न निर्देशन दिएका छन् । चीनले ३१ डिसेम्बर, २०१५ मा सेनाको ‘स्टाटेजिक सपोर्ट फोर्स’ भंग गरेको थियो । यसको स्थानमा एयरोस्पेस र साइबर युनिटले काम गरिरहेको छ । चिनियाँ रक्षा मन्त्रालयका प्रवक्ता वु कियानका अनुसार नयाँ सुधारपछि अब चिनियाँ जनमुक्ति सेनामा सेना, नौसेना, वायुसेना र रकेट फोर्स गरी चार सेवा छन् ।

यस बाहेक एयरोस्पेस फोर्स, साइबरस्पेस फोर्स, इन्फरमेसन सपोर्ट फोर्स र ज्वाइन्ट लजिस्टिक सपोर्ट फोर्स समेत छन् । एयरोस्पेस फोर्सबाट चीनले अन्तरिक्षमा आफूलाई बलियो बनाउनेछ साइबरस्पेस फोर्सले देशलाई साइबर हमलाबाट बचाउँदै डाटाको सुरक्षा गर्नेछ ।

चीनले बनाउन लागेको नयाँ युनिटबारे भने धेरै जानकारी दिएको छैन । आधुनिक युद्ध जित्न सूचना महत्वपूर्ण साधन हो । जोसँग बढी सूचना हुन्छ, उसले युद्ध जित्ने सम्भावना बढी रहन्छ ।

चिनियाँ सेनाले बी यीलाई सेनाको नयाँ युनिटको कमाण्डर बनाएको छ । यसअघि उनी स्ट्राटेजिक सपोर्ट फोर्सका डेपुटी कमाण्डर थिए । हङकङको समाचारपत्र मिंग पाओका अनुसार स्ट्राटेजिक सपोर्ट फोर्सको पोलिटिकल कमिश्नर भइसकेका जनरल ली वेईलाई नयाँ युनिटमा पनि पोलिटिक कमिश्नरको जिम्मा दिइएको छ ।

एक दशकमा चीनले पूर्वी एसियामा सबैभन्दा धेरै रक्षा खर्च गरेको छ । चीनको बढ्दो सैन्य शक्तिलाई मध्यनजर गर्दै छिमेकी जापान र ताइवानले आफ्नो सैन्य बजेटमा भारी वृद्धि गरेका छन् ।

भिडियाे हेर्नुहाेस् :