अन्तर्राष्ट्रिय बजारमा नेपालकै ब्रान्डिङ र प्रमोसन

A+ A A-

पोखरालाई नेपालको पर्यटकीय राजधानी घोषणा गर्ने विषय निकै लामो समयदेखि उठिरहेको छ । पोखराका पर्यटन व्यवसायी, राजनीतिकर्मीहरूले यो विषयलाई प्राथमिकतामा राख्दै आउनुभएको छ ।

कास्कीबाट निर्वाचित जनप्रतिनिधि जो संघीय सरकारको मन्त्री पनि हुनुभयो, उहाँहरूले पनि यो विषयलाई प्राथमिकतामा राख्नुभएको थियो । स्थानीय सरकार, प्रदेश सरकारले पनि यसमा जोड दिएका छन् । त्यसैले, यी सरकारले संघीय सरकारलाई निरन्तर दबाब दिइरहेका छन् । व्यवसायीहरूले पनि पटक–पटक आवाज उठाइरहेका छन् ।

संघीय सरकारका संस्कृति, पर्यटन तथा नागरिक उडड्यन मन्त्रीहरूले पर्यटकीय राजधानी घोषणा गर्ने विषयमा पोखरालाई पटक–पटक वचन दिनुभएको छ ।

तत्कालीन पर्यटनमन्त्री रवीन्द्र अधिकारी, प्रेम आलेदेखि अहिलेका पर्यटनमन्त्री जीवनराम श्रेष्ठसम्मले पोखरेली नागरिकलाई आश्वासन दिनुभएको छ । यद्यपि, संघीय सरकारको ढिलाइका कारणले अहिलेसम्म मूर्त रूप भने पाउन सकेको छैन ।

केही साताअघि संस्कृति, पर्यटन तथा नागरिक उड्डयनमन्त्री जीवनराम श्रेष्ठलाई पोखराका मेयर धनराज आचार्य र मैले ‘पोखरालाई पर्यटकीय राजधानी घोषणा गर्नुपर्ने’ महानगरको पहिलो निर्णय हस्तान्तरण गरेका थियौँ ।

विश्व शान्ति स्तूप र त्यहाँबाट देखिने हिमाल । तस्वीरः पोखरा महानगरपालिकाको वेबसाइटबाट ।

उक्त समयमा मन्त्री श्रेष्ठले पोखरालाई पर्यटकीय राजधानी घोषणा गर्ने प्रस्ताव मन्त्रिपरिषद्‌मा लैजाने बताउनुभएको थियो । पर्यटकीय राजधानी घोषणाका लागि र घोषणा भइसकेपछि के–के गर्नुपर्ने अन्तर्राष्ट्रिय अभ्यास छन् भनेर बुझ्नका लागि पर्यटनमन्त्री श्रेष्ठले एउटा विषयगत समिति बनाइसक्नुभएको छ । पोखरेलीहरूको चाहना, संघीय सरकारका मन्त्री पनि सकारात्मक भएको हुनाले यो घोषणा चाँडै हुन्छ होला ।

पोखरा नै पर्यटकीय राजधानी किन भन्ने प्रश्न रहेको छ । पोखरा पर्यटनका सबै विधा सम्मिलित पर्यटकीय गन्तव्य हो ।

केही साताअघि संस्कृति, पर्यटन तथा नागरिक उड्डयनमन्त्री जीवनराम श्रेष्ठ पोखरा आएको बेला पोखराका मेयर धनराज आचार्य र मैले मन्त्री श्रेष्ठलाई ‘पोखरालाई पर्यटकीय राजधानी घोषणा गर्नुपर्ने’ महानगरको पहिलो निर्णय हस्तान्तरण गरेका थियौँ ।

पर्यटकका लागि सबै प्रकारका सुविधा पनि छन् । राजधानी भनेको राज्यको प्रतिबिम्ब पनि हो । त्यो पोखरामा प्रतिबिम्बित हुन्छ । आन्तरिक र बाह्य पर्यटकको प्रमुख गन्तव्यको रूपमा पोखरा नै रहेको छ । हरेक नेपालीहरू पोखरा घुम्न चाहन्छन् ।

नेपाल आउने विदेशी पर्यटकहरूमध्ये अधिकांश पोखरा घुमेर मात्र फर्किन्छन् । पोखरा मात्र होइन, आसपासका गन्तव्यहरू पनि विस्तारित भएका छन् । प्रवर्द्धन भइरहेका छन् । पोखरा र आसपासको संस्कृति, सम्पदा, प्राकृतिक सुन्दरता सबै कुराले पोखरालाई पर्यटकीय राजधानीका लागि योग्य बनाएको छ ।

अन्तर्राष्ट्रिय बजारमा पोखराको पर्यटनको विस्तार र प्रवर्द्धनका लागि पर्यटकीय राजधानी घोषणा हुँदा थप निकै सहज हुन्छ । नेपालमा पर्यटकीय राजधानी घोषणा भयो भन्दा अन्तर्राष्ट्रिय पर्यटन बजारमा नयाँ तरंग पैदा हुन्छ ।

यद्यपि, राजधानी घोषणा भएपछि निश्चित मापदण्डहरू पूरा गर्नुपर्ने हुन्छ । त्यसका लागि भने संघीय सरकार, प्रदेश सरकार, स्थानीय सरकारका साथै पर्यटन व्यवसायीसँगै स्थानीयको भूमिका पनि महत्त्वपूूर्ण हुन्छ ।

पूर्वाधारको विकास, वातावरणीय पक्ष, सांस्कृतिक पाटो, स्थानीय चालचलनले महत्त्वपूर्ण भूमिका निर्वाह गरेको हुन्छ । राजधानी घोषणासँगै अन्तर्राष्ट्रिय बजारलाई नयाँ सन्देश दिने गरी नयाँ निर्णय पनि गर्नुपर्नेचाहिँ हुन्छ ।

विषयगत समितिले दिने सुुझावबाट पनि सरकारले निर्णय गर्दा ती कुराहरूमा ध्यान दिन्छ होला । पोखरा पर्यटकीय राजधानी घोषणा भएमा हामीले नेपाललाई अन्तर्राष्ट्रिय बजारमा ब्रान्डिङ र प्रमोसन नयाँ ढंगले आक्रामक रूपमा गर्न सक्छौँ ।

आचार्य नेपाल पर्यटन बोर्डका बोर्ड सदस्य हुन्

प्रकाशित मिति: मंगलबार, साउन १७, २०७९ ०६:२३