बजेट निर्माणको काममा कोरोना बाधक : छ जना कर्मचारीमा संक्रमण, कार्यतालिका प्रभावित

बजेट निर्माणको काममा कोरोना बाधक : छ जना कर्मचारीमा संक्रमण, कार्यतालिका प्रभावित

A+ A A-

कोरोना भाइरसको संक्रमण बढेपछि बजेट निर्माण प्रक्रियासमेत प्रभावित हुन थालेको छ । बजेट निर्माणको काममा खटिएका कर्मचारीहरूमा कोरोना संक्रमण पुष्टि भएपछि काम प्रभावित भएको हो ।

आगामी आर्थिक वर्षको बजेट पेस गर्ने दिन नजिकिएको छ । संवैधानिक व्यवस्थाअनुसार १५ जेठमा सरकारले आगामी आर्थिक वर्षको बजेट पेस गर्नुपर्ने हुन्छ ।

बजेट तयारीमा मन्त्रीदेखि अधिकृत तहका कर्मचारीहरूसमेत बिहान सबेरैदेखि बेलुका अबेरसम्म बजेटको काममा जुटेका छन् । काममा खटिएका कर्मचारीमा एकपछि अर्को कर्मचारी संक्रमण देखिएपछि अर्थ मन्त्रालयभित्र अन्योलता बढेको छ । अर्थ मन्त्रालय स्रोतका अनुसार मन्त्रालयभित्र छ जना कर्मचारीलाई कोरोना संक्रमण देखिएको छ ।

बजेट महाशाखाअन्तर्गत बजेट सूचना प्रणाली (एलएमबीआइएस) सफ्टवेयर चलाउने इन्जिनियरलाई नै संक्रमण देखिएको छ । त्यस्तै, बजेटकै एक कम्प्युटर इन्जिनियर र एक उपसचिवसहित मन्त्रालयभित्र छ जनामा कोरोना संक्रमण देखिएको छ ।

‘हाम्रोतर्फबाट सकेको स्वास्थ्य मापदण्ड पूरा गरेर काम गरेका छौँ । तर, सँगैको साथीलाई देखिन थालेपछि त्रास त बढेको छ नै,’ अर्थका एक अधिकारीले भने । निषेधाज्ञा र स्वास्थ्य क्षेत्रमा परेको प्रभावले बजेटको प्राथमिकता परिवर्तन गर्नुपरेको छ । अर्कोतर्फ बजेट निर्माणको काममा खटिएका कर्मचारीहरूमा कोरोना संक्रमण देखिएपछि काममा समस्या सिर्जना भएको छ ।

‘एक तहका कार्यक्रमहरू निर्धारण गरेको र मन्त्रालयहरूसँग पनि छलफल गरिसकेका बेला परिस्थिति थप प्रतिकूल बनेको छ, यस्तो अवस्थामा कार्यक्रमको प्राथमिकीकरणमा केही परिवर्तन गर्नुपर्ने हुन्छ,’ बजेट निर्माण कार्यमा खटिएका एक सहसचिवले भने ।

अर्थ मन्त्रालय १ चैतदेखि कार्यतालिका बनाएर बजेट निर्माणमा जुटेको थियो । बजेट निर्माण तालिकाअनुसार विनियोजन विधेयकका सिद्धान्त र प्राथमिकता संघीय संसदका दुवै सदनमा अर्थमन्त्रीले पेस गर्ने कार्यतालिका थियो ।

यसअघि राष्ट्रपतिले संसदको अधिवेशन अन्त्य गरेपछि यो कार्यतालिका पनि प्रभावित भएको छ । २७ वैशाखका लागि राष्ट्रपति विद्यादेवी भण्डारीले बजेट अधिवेशन बोलाएकी छिन् । बजेट अधिवेशन सुरु भएपछि राष्ट्रपतिले आगामी वर्षका नीति तथा कार्यक्रम पेस गर्ने र ती नीति तथा कार्यक्रमउपर छलफल बजेट प्राथमिकीकरण गर्नुपर्ने भए पनि बजेट अधिवेशन नै ढिला गरी सुरु हुने भएपछि पर्याप्त छलफल नहुने पक्का भएको छ ।