इजलासमा सेटिङबारे सांसदहरूको संशय, सर्वाेच्चका प्रस्तावित न्यायाधीशहरूको यस्तो जवाफ

इजलासमा सेटिङबारे सांसदहरूको संशय, सर्वाेच्चका प्रस्तावित न्यायाधीशहरूको यस्तो जवाफ

नहकुल सुवेदी र कुमार चुडाल संसदीय सुनुवाइमा

A+ A A-

संसदीय सुनुवाइ समितिमा सांसदहरूले इजलासमा हुने सेटिङबारे संशय व्यक्त गरेका छन् । सांसदहरूले सेटिङ रोक्ने उपायबारे न्याय परिषद्बबाट सर्वोच्चकाे न्यायाधीशमा सिफारिस कुमार चुडाल र नहकुल सुवेदीलाई प्रश्न गरेका थिए । यस्तै राजनीतिक पूर्वाग्रह राखेर अदालतले फैसला गरेको सांसदहरूले गुनासो गरेका थिए ।

सेटिङबारे न्यायाधीशहरूलाई प्रश्न राख्दै सांसद जितेन्द्र देवले भने, 'संविधानले स्वतन्त्र न्यायपालिका भने पनि संविधानको मर्मअनुसार अदालतको काम देखिँदैन । क्याबिनेटले न्यायपालिकालाई स्याडोमा राख्न खोजेको जस्तो देखिन्छ । न्यायपालिकालाई कसरी स्वतन्त्र कायम गर्नुहुन्छ ?

यस्तै सांसद राजेन्द्र श्रेष्ठले न्यायपालिका सम्बन्धमा बेञ्च सेटिङको कुरा निकै सुनिन्छ । यसलाई अन्त्य गर्न के कस्तो कार्ययोजना छ भन्दै प्रश्न गरेका थिए ।

यस्तै, अर्का सांसद भीमसेनदास प्रधानले अदालतले राजनीतिक पूर्वाग्रह साँधेर फैसला गरेको पाइएको भन्दै प्रश्न गरे, 'राजनीतिक आस्थाका आधारमा विद्यार्थीको झगडामा ३६ लाख धरौटी माग्ने गरिएको छ । पूर्वाग्रही फैसला हुन नदिन के गर्नुहुन्छ ?'

सांसद पुष्पा भुसालले सोधिन्, 'न्यायपालिकालाई कार्यपालिकाको प्रभावबाट कसरी मुक्त गर्नुहुन्छ ?'

ती प्रश्नको जवाफ दिँदै प्रस्तावित न्यायाधीश कुमार चुडाल र नहकुल सुवेदीले स्वतन्त्र न्यायपालिकाप्रति प्रतिवद्ध रहेको बताए । इजलासको सेटिङबारे जवाफ दिँदै चुडालले भने, 'स्वचालित प्रणालीमा गयौँ भने यस्तो कुरा नै आउँदैन । यसका लागि कानुन आवश्यक पर्छ । बरु त्यसमा सहयोग गरिदिनुहोला ।'

चुडालले राजनीतिक प्रभावमा कुनै पनि निर्णय नगरिएको बताए । सांसद प्रधानको प्रश्नमा उत्तर दिँदै उनले भने, 'ज्यान मार्ने मुद्दा थियो । सबै घटना विचार गरिएरै धरौटी तोकिएको हो । यसमा कुनै पनि पूर्वाग्रह छैन ।'

समितिमा जवाफ दिँदै अर्का प्रस्तावित न्यायाधीश नहकुल सुवेदीले न्यायपालिकालाई कार्यपालिकाको छायाँमा पर्न नदिने बताए । 'कार्यपालिकाले न्यायापालिकालाई प्रभाव पार्ने काम कल्पना गर्न सकिँदैन । न्यायाधीश कसैको प्रभावमा पर्‍यो भने न्यायालयको अस्तित्व नै रहँदैन । स्वतन्त्र न्यायपालिकाको अस्तित्वका लागि मैले प्रभावकारी भूमिका निर्वाह गर्छु ।'

बैठकमा न्‍यायाधीश सुवेदीको योग्यताबारे समेत सांसदहरूले प्रश्न उठाएका थिए । सुवेदीले आफ्नो इमानदारिता र कामप्रतिको निष्ठाका आधारमा न्याय परिषद्ले आफ्नो नाम सिफारिस गरेको जवाफ दिए । 'मैले इमानदार र निष्ठापूर्वक काम गरेकाले मलाई न्यायाधीशमा सिफारिका गरिएको भन्ने लाग्छ,' उनले भने ।

समितिमा न्यायाधीश सुवेदीकाे याेग्यता नपुगेकाे भन्दै उजुरी परेकाे थियाे भने सर्वाेच्च अदालत बार एसाेसिएसनले पनि सुवेदीकाे याेग्यता नपुग्ने संस्थागत धारणा सार्वजनिक गरेकाे थियाे ।

न्याय परिषद्ले २८ फागुनमा चुडाल र सुवेदीलाई सर्वोच्चको न्यायाधीशमा सिफारिस गरेको थियो । संसदीय सुनुवाइ समितिले उनीहरूलाई सर्वसम्मतिले अनुमोदन गरेको छ । राष्ट्रपतिबाट शपथग्रहण गरेपछि उनीहरूको नियुक्तिले पूर्णता पाउनेछ ।

प्रकाशित मिति: शुक्रबार, वैशाख ३, २०७८ १७:०९