भन्सार छल्ने बालाजी ग्लासलाई ५०० प्रतिशत जरिवाना

A+ A A-

सिसाको आयातमा ‘फल्ट’ गर्ने बालाजी ग्लासलाई सुक्खा बन्दरगाह भन्सार कार्यालय वीरगञ्जले ५०० प्रतिशत जरिवाना लगाएको छ ।

भन्सार छल्ने उद्देश्‍यले बढी एमएम भएको सिसालाई कम एमएमको भनेर ढाँटेको प्रमाणित भएपछि मंगरबार ५०० प्रतिशत जरिवाना लगाएर पास गराइने निर्णय भएको भन्सार अधिकृत चुणामणि कट्टेलले जानकारी गराए ।

भन्सार कार्यालयले अहिले चारवटा कन्टेनरमाथि अनुसन्धान भइरहेकोमा दुईवटा कन्टेनरलाई ५०० प्रतिशत जरिवाना गराउने निर्णय लिएको हो । यी दुईवटा कन्टेनर नेपालको सिसाको आयात गर्ने मुख्य कम्पनी बाजाली ग्लास हो ।

भन्सार स्रोतका अनुसार थप दुईवटा कन्टेनरमा पनि फल्ट भेटिएको छ भने थप ८० वटा कन्टेनर आशंकमा रहेका छन् । वास्तविकभन्दा कम एमएमको सिसाको बिल देखाएर वीरगन्ज सुक्खा बन्दरगाहबाट सिसा नेपाल भित्र्याउन खोज्दा दुईवटा कन्टेनर भन्सार कार्यालयको फन्दामा परेका थिए ।

‘बालाजीको विषय टुंगो लगाइएको छ, त्यो पार्टीको भन्सार छली गर्ने उद्देश्य नै रहेको देखिएकोले ५०० प्रतिशत जरिवाना लगाउने भएका छौँ,’ भन्सार अधिकृत कट्टेलले भने । भन्सार ऐन २०६४ अनुसार यी सामानमाथि ५०० प्रतिशत जरिवाना लगाइएको हो ।

कम मूल्यांकन गरेर सिसा ल्याइएको भेटिएपछि ईसीएमयू २०६४३७२२ जी १ र टीईएमयू ३६८१२४२२ जी १ नम्बरका कन्टेनरको भन्सार पास दुई सातादेखि रोकिएको थियो ।

बालाजीले ४ एमएम बिल बनाएर साढे चार र पाँच एमएमको सिसा लिएको पाइएको थियो । करिब एक सेन्टिमिटर बराबर ५८ देखि एक सय १७ रुपैयाँसम्म भन्सार छली भएको छ भने अन्तःशुल्क र भ्याटसमेत वास्तविक तिर्नुपर्नेभन्दा कम मूल्यांकन गरेर बुझाउँदा छली भएको भन्सार अधिकारीहरूको भनाइ छ ।

भन्सारले एमएममा मात्रै सादा रङको सिसा भनेर रङ्गिन ल्याएको आशंका गरेकोमा कलरमा भने फल्ट नदेखिएको भन्सार अधिकृतले बताएका छन् । विशेष सूचनाका आधारमा सुक्खा बन्दरगाहमा आइपुगेका सिसाका कन्टेनर चेकजाँच गर्दा भन्सारमा गलत ‘डिक्ल्यारेसन’ गरेको पाइएको थियो ।

अहिलेसम्म सम्मपर्कमा आएको बालाजीलाई जरिवाना तिराएर पास गराउने निर्णय भन्सार कार्यालयले गरे पनि अन्य आयातकर्ताहरू भने भन्सारको सम्पर्कमा गएका छैनन् । एमएम छलीमा तिरुपति ग्लास पनि परेको भन्सार स्रोतले दाबी छ ।

भन्सार स्रोतका अनुसार बालाजीले यी कन्टेनर उम्काउनका लागि निकै ठूलो प्रयास गरे पनि पास गराउन नसेपछि शरणमा आएको थियो । भन्सार कार्यालय प्रमुख लालबहादुर खत्रीले अन्य कम्पनीका एजेन्टहरूलाई पनि सम्पर्कमा आएर डकुमेन्ट पेस गर्नको लागि आग्रह गरेका छन् ।

भन्सार अधिकारीहरूका अनुसार पाँच एमएम मोटाइ भएको सिसालाई स्क्वायर फिटको आधारमा तीन डलर भन्सार शुल्क तिर्नुपर्ने हुन्छ भने चार एमएम मोटाइ भएकोलाई दुई डलर र साढे चार एमएम भएको सिसालाई साढे दुई डलर भन्सार शुल्क तिर्नुपर्ने हुन्छ ।

सिसा आयात गर्दा ३० प्रतिशत भन्सार लाग्छ । तर, व्यापारीले बढी एमएम मगाउने र भन्सारमा कम एमएमको मूल्यांकन गराएर भन्सार दाखिला गरी मालसामान छिराइरहेका थिए ।

प्रकाशित मिति: मंगलबार, चैत १०, २०७७ १५:५४