बैंकमा लगातार निक्षेपभन्दा कर्जा बढी, चालु वर्षमा ४ खर्ब ८५ अर्बको ऋण प्रवाह

बैंकमा लगातार निक्षेपभन्दा कर्जा बढी, चालु वर्षमा ४ खर्ब ८५ अर्बको ऋण प्रवाह

A+ A A-

पुसकाे अन्तिम सातादेखि लगातार १० हप्ता बैंकमा संकलित निक्षेप रकमभन्दा बैंकबाट प्रवाह हुने ऋण बढी गएको देखिएको छ । पुसको अन्तिम साता ५ अर्ब मात्रै निक्षेप जम्मा हुँदा २४ अर्ब रुपैयाँ ऋण प्रवाह भएको थियो ।

त्यसपछि हरेक साता बैंकबाट निक्षेपभन्दा बढी कर्जा प्रवाह भएको तथ्यांकले देखाएको छ । यसले बैंकमा तरलताको समस्या देखा पर्न सक्ने संकेत देखिएको छ । माघ महिनामा ५ अर्ब रुपैयाँको निक्षेप संकलन हुँदा ७३ अर्ब रुपैयाँको कर्जा विस्तार भएको थियो । त्यही अवस्था फागुनमा पनि देखिएको छ ।

नेपाल बैंकर्स संघको तथ्यांकअनुसार फागुन पहिलो साता १२ अर्ब रुपैयाँ निक्षेप संकलन हुँदा १७ अर्ब रुपैयाँको ऋण प्रवाह भएको छ भने फागुनको दोस्रो साता अर्थात् फागुन ७ देखि १४ गतेको अवधिमा ११ अर्ब निक्षेप संकलन हुँदा २७ अर्ब रुपैयाँको ऋण प्रवाह भएको थियो । फागुन तेस्रो साता १३ अर्बको निक्षेप संकलन हुँदा २६ अर्बको कर्जा विस्तार भएको छ ।

अवधि	निक्षेप संकलन (अर्बमा)	ऋण प्रवाह (अर्बमा)
२९ पुसदेखि २ माघ	-3	-8
२ माघदेखि ९ माघ	-10	11
९ माघदेखि १६ माघ	10	21
१६ माघदेखि २३ माघ	5	20
२३ माघदेखि ३० माघ	2	29
३० माघदेखि ७ फागुन	12	17
७ फागुनदेखि १४ फागुन	11	27
१४ फागुनदेखि २१ फागुन	१३	२६

पछिल्लो १० हप्तामा ६६ अर्बको निक्षेप संकलन हुँदा दुई खर्ब २५ अर्ब रुपैयाँको ऋण प्रवाह भएको देखिएको छ । चालु वर्षमा भएको समग्र कर्जा परिमाण र निक्षेप संकलनको तथ्यांकलाई केलाउँदा प्रवाह भएको कर्जाको तुलनामा निक्षेप संकलन कम देखिन्छ ।

साउन पहिलो सातादेखि फागुनकाे तेस्रो सातासम्मको अवधिमा २७ वाणिज्य बैंकले ३ खर्ब ३५ अर्ब रुपैयाँ निक्षेप संकलन गरेका छन् भने ४ खर्ब ८५ अर्ब रुपैयाँ कर्जा विस्तार गरेको तथ्यांकले देखाएकाे छ । ऋण प्रवाहमा सबैभन्दा धेरै पुस मसान्तको एक दिन मात्रै ५८ अर्ब रुपैयाँ भएको छ । यस दिन २१ अर्ब निक्षेप संकलन भएको थियो । सबै क्षेत्रका व्यवसायीबाट ऋणको माग बढे पनि निक्षेप संकलन भने उल्लेखनीय रूपमा हुन नसकेको बैंकरहरूले बताएका छन् ।

राष्ट्र बैंकले चालु वर्षमा बैंकलाई पुनर्कर्जाको रकमको सीमा बढाएकाले पनि ऋण प्रवाह बढी देखिएको उल्लेख गरेको छ । राष्ट्र बैंकको तथ्यांकअनुसार ८३ अर्ब रुपैयाँ बराबरको पुनर्कर्जा प्रवाह भएको छ ।

गत वर्ष यही फागुनसम्म १ खर्ब ६० अर्बको निक्षेप जम्मा हुँदा १ खर्ब ३० अर्बको कर्जा विस्तार भएको थियो भने त्यसपछिका चार महिना १ खर्ब ९१ अर्ब निक्षेप संकलन हुँदा ९२ अर्ब रुपैयाँ मात्रै कर्जा विस्तार भएको थियो । गत वर्ष बढी निक्षेप संकलन र कम कर्जा विस्तार भएको र चालु वर्षमा पनि राष्ट्र बैंकले पुनर्कर्जा बढाएकाले अहिले वाणिज्य बैंकहरूमा करिब ४० अर्ब रुपैयाँबराबरको लगानीयोग्य रकम रहेको राष्ट्र बैंकको तथ्यांक छ ।

चालु वर्षको फागुन मसान्तसम्म ३ खर्ब ३५ अर्ब निक्षेप संकलन र ४ खर्ब ८५ अर्ब ऋण प्रवाह भएको छ । पछिल्लो महिना आयात बढ्न थालेपछि बैंकमा कर्जाको माग पनि बढ्न थालेको छ ।

प्रकाशित मिति: बुधबार, फागुन २६, २०७७ १५:१९