विवाद पार्टीमा, प्रभाव मन्त्रिपरिषद्‍मा

A+ A A-

बुधबार मात्रै आफूले प्रधानमन्त्रीबाट राजीनामा नदिने बताएका प्रधानमन्त्री केपी शर्मा ओलीले बिहीबारको मन्त्रिपरिषद् बैठकमा सोही विषयलाई ब्रिफिङ गरेका छन् । सत्तारूढ नेकपाभित्र विवाद देखिन थालेसँगै प्रधानमन्त्री ओलीले नै पार्टीभित्रबाटै आफू नेतृत्वको सरकार ढाल्न खोजेको संकेत गर्दै आएका छन् ।

विगतमा पार्टी विवाद उत्कर्षमा पुगेको बेला प्रधानमन्त्री ओलीले छिमेकी देश भारतर्फ इंगित गर्दै आफूलाई प्रधानमन्त्रीबाट हटाउने प्रयास भएको बताएका थिए । प्रधानमन्त्री ओलीले दल विभाजनसम्बन्धी अध्यादेश ल्याएसँगै पार्टी विवाद उत्कर्षमा पुगेको बेला प्रधानमन्त्री ओलीले त्यस्तो प्रतिक्रिया दिएका थिए ।

त्यसलगत्तै उनले मन्त्रिपरिषद् बोलायर षड्यन्त्र हुन सक्ने भन्दै त्यसको सामाना गर्न तयार हुन मन्त्रीहरूलाई आग्रह गरेका थिए ।

अहिले पुन: मन्त्रिपरिषद् फेरवदल कर्णाली प्रदेशमा देखिएको पार्टी विवाद तथा भारतीय गुप्तचर संस्था 'रअ' प्रमुख सामन्त गोयलसँग भेटवार्ताका कारण पार्टीमा विवाद देखिएपछि प्रधानमन्त्रीले पुन: आफूलाई हटाउन खोजिएको आरोप लगाउन थालेका छन् ।

उनले बुधबार एक कार्यक्रममा आफ्नो राजीनामा मागिएको संकेत गर्दै आफू राजीनामा दिनेवाला नभएको बताएका थिए । बिहीबारको मन्त्रिपरिषद् बैठकमा पनि उनले मन्त्रीहरूलाई यसै विषयमा ब्रिफिङ गरेको एक मन्त्रीले जानकारी गराएका छन् ।

'मन्त्रिपरिषद् बैठकको सुरुवातामा नै प्रधानमन्त्रीले केही विषयमा ब्रिफिङ गर्नुभएको थियो,' ती मन्त्रीले भने, 'प्रधानमन्त्रीले अहिले चुनौती बढेको छ, त्यसको सामना गर्नुपर्छ, सजिलै चिर्न सकिन्छ भन्नुभयो ।'

प्रधानमन्त्रीले सरकार फेरवदल हुन्छ कि भन्ने डर नमानी काम गर्नको लागि सबै मन्त्रीहरूलाई आग्रह गरेका छन् । सरकारभित्र बसेर सरकारको काममा टिप्पणी गर्नुको साटो प्रभावकारी काम गर्नको लागि प्रधानममन्त्रीको निर्देशन भएको ती मन्त्रीले बताए ।

पार्टीभित्र विवाद चुलिँदै गएपछि बुधबारबाट ओलीले आफू निकटका कार्यकर्तास्तरमा समेत छलफल गर्न सुरु गरेका छन् । उनले बुधबार प्रदेश १ का आफू निकटका कार्यकर्ताहरूलाई पनि जुनसुकै अवस्थाको सामना गर्नका लागि तयारी अवस्थामा बस्न आग्रह गरेका थिए ।

प्रकाशित मिति: बिहीबार, कात्तिक २०, २०७७ १६:४७