कर्मचारीलाई नवनियुक्त अर्थमन्त्री पौडेलको 'सुशासन क्लास'

A+ A A-

नवनियुक्त अर्थमन्त्री विष्णु पौडेलले कर्मचारीहरूलाई सुशासन र मितव्ययिताको 'क्लास' दिएका छन् । बिहीबार पद बहालीलगत्तै अर्थकाे सुवर्ण हलमा मन्त्रालय, राष्ट्र बैंक, राजस्व तथा भन्सार र धितोपत्र बोर्डका प्रतिनिधिलाई अगाडि राखेर उनले मितव्ययिताकाे सन्देश प्रवाह हुनेगरी काम गर्न निर्देशन पनि दिए ।

'मितव्ययिताले धेरै ठूलो स्रोत बचाउने त हाेइन, त्यसले सन्देश दिन्छ र मनोविज्ञान निर्माण गर्छ', मन्त्री पौडेलले भने । उनले मितव्ययिताको सन्दर्भमा नयाँ ढंगले सोच्न कर्मचारीलाई एजेण्डाको रूपमा छोडेको बताए ।

कर्मचारीकाे कार्यसम्पादन पारदर्शी, मितव्ययी भए मात्र प्रशासनको सरलीकरण र निर्णय प्रक्रियामा सरोकारवालाको सहभागिता रहने उनले बताए । 'सुशासन मिच्ने छुट कसैलाई छैन', उनले भने, 'सुशासनको खिलाफ कुनै पनि काम कारबाहीमा किञ्चित छुट हुने छैन, यस्ता कुरामा म कहिल्यै मञ्जुर हुन सक्दिनँ । यस कुरालाई आत्मसात् गर्नुहोला, नत्र समस्या पर्न सक्छ ।'

मन्त्री पौडेलले वर्तमान चुनौतीलाई एक्लै सामना गर्न नसक्ने बताउँदै आफूलाई साथ दिन आग्रह गरे । उनले सफलताको पुँजी कर्मचारीको खल्तीमा रहेको टिप्पणी गरे । पौडेलले भने, 'सफलताको पुँजी मेरो खल्तीमा छैन, तपाईंहरूको खल्तीमा छ । झिकेर घुमाउनुभयो भने उपलब्धि हुन्छ ।' कर्मचारीलाई विश्वासमा लिएर काम गर्न चाहेकाे आशय उनकाे थियाे ।

यसअघिका अर्थमन्त्रीलाई कर्मचारी र सरोकारवालाको गुनासो नसुनेको र शासक बन्न खोजेको आरोप लाग्ने गरेकाे सन्दर्भमा मन्त्री पौडेलले भने, 'म यहाँ कुनै शासक बन्न आएको हाेइन, म साथी बनेर काम गर्नेछु ।'

उनले वर्तमान अवस्था आफ्ना लागि निकै चुनौतीपूर्ण रहेको स्वीकार गरे । यही अवस्थाबाट अर्थतन्त्र उकास्ने जिम्मेवारीका साथमा आफ्नो आगमन भएको पौडेलको भनाइ थियो ।

पौडेलले आफ्ना आगामी योजना पनि केही सुनाए । वर्तमान अवस्थामा नियामक निकायको भूमिका अझ धेरै प्रभावकारी बनाउनुपर्ने उनको भनाइ थियो ।

निजीक्षेत्रको मनोबल उठाएर अघि बढ्नुपर्नेमा उनकाे जाेड थियाे । 'निजीक्षेत्रको मनोबल केही खस्किएको छ, मनोबल उठाउनुपर्नेछ, उत्पादन र लगानीमा प्रेरित गर्नुपर्नेछ', उनले भने ।

दातृ निकायले थप विश्वास गर्ने वातावरण निर्माण गर्न आवश्‍यक रहेको मन्त्री पौडेलले बताए । 'दातृ निकायसँगको सम्बन्ध अझ जीवन्त बनाएर अघि बढ्नुपर्नेछ, प्रजातान्त्रिक अभ्यास र विकासप्रतिको प्रतिवद्धतामा उनीहरूको विश्‍वास जित्दै अघि बढ्नुपर्नेछ', उनले भने ।

यसअघि २०७२ सालमा अर्थमन्त्री बनेर आर्थिक वर्ष २०७३/७४ को बजेट ल्याएका पौडेलले बिहीबार दोस्रो कार्यकाल सुरु गर्दैगर्दा विश्व बैंकबाट २० करोड डलर ऋण लिने टिप्पणीमा हस्ताक्षरसमेत गरेका छन् ।

प्रकाशित मिति: बिहीबार, असोज २९, २०७७ १७:०९