बालुवाटारले स्वास्थ्य मापदण्ड पालना गरेन : स्वास्थ्य मन्त्रालय

A+ A A-

प्रधानमन्त्रीको सरकारी निवास बालुवाटारले जनस्वास्थ्यका मापदण्ड 'फलो' नगर्दा प्रधानमन्त्रीको सचिवालयका सदस्य, सुरक्षाकर्मी र कर्मचारीमा कोरोना भाइरस सरेको स्वास्थ्य तथा जनसंख्या मन्त्रालयले निष्कर्ष निकालेको छ ।

शिलापत्रसँग कुरा गर्दै स्वास्थ्य मन्त्रालयका प्रवक्ता डा. जागेश्वर गौतमले भने, ‘जनस्वास्थ्यका मापदण्ड पालना नगरेको र भीडभाड भएकाले भाइरस सरेको हो । अहिले स्वास्थ्य मन्त्रालयले जति काम कसले गरेको छ ? स्वास्थ्यका मान्छे सुरक्षित छन् । मान्छेलाई मापदण्ड पालना गर्न किन गाह्रो हो ?’

शुक्रबार प्रधानमन्त्री केपी शर्मा ‍‌ओलीको तीन जना सल्लाहकार, प्रमुख स्वकिय सचिवसहित बालुवाटारमा खटिएका ७० जना सुरक्षाकर्मी गरी ७४ जना कोरोना भाइरस संक्रमण देखिएको छ ।

प्रधानन्त्रीको सचिवालयका सबै सदस्यको शुक्रबार गरिएको परीक्षणमा प्रमुख राजनीतिक सल्लाहकार विष्णु रिमाल, प्रेस सल्लाहकार सूर्य थापा, विदेश मामिला सल्लाहकार डा. राजन भट्टराई र प्रमुख स्वकीय सचिव इन्द्र भण्डारीलाई कोरोना संक्रमण पुष्टि भएको छ ।

त्यस्तै, सरकारी निवास बालुवाटारको सुरक्षामा खटिएका नेपाली सेनाका २८, सशस्त्र प्रहरीका १८, जनपद प्रहरीका २१ र राष्ट्रिय अनुसन्धानका ३ गरी ७० जना सुरक्षाकर्मीमा पनि कोरोना संक्रमण पुष्टि भएको हो । अन्य ४५ जनाको नतिजा आउन बाँकी रहेको प्रधानमन्त्रीको सचिवालयले जनाएको छ ।

प्रधानमन्त्री कार्यालयमा कहाँबाट फैलिएको हो त्यसको अध्ययन भइरहेको प्रवक्ता डा गौतमले बताए । ‘सुरक्षाकर्मीबाट आयो कि कहाँबाट आयो हेर्न बाँकी छ । कतिको रिपोर्ट आउनै बाँकी छ,’ उनले भने, ‘कसैले न कसैले सारेको हो ।’

नेपालमा समुदायमा संक्रमण गएको भन्न नमिल्ने उनको तर्क छ । ‘काठमाडौंमा क्लस्टमा देखिएको हो । पूरै देशमा फैलियो भने मात्र समुदायमा गएको भन्ने हो । काठमाडौंमा देखिनु भनेको क्लस्टरमा देखिनु हो ।’

जनस्वास्थ्यका मापदण्ड पालना नभएकाले काठमाडौंमा संक्रमण अझैँ बढ्ने उनले दाबी गरे । ‘काठमाडौंमा अझैँ संक्रमण बढ्छ । भीडभाड गर्ने, माइतीघरमा आन्दोलन भइरहेको छ । भीडभाड र आन्दोलनबाट संक्रमण फैलिएको हो । सरकारले मात्र चाहेर हुँदैन । आफूले मापदण्ड उल्लंघन गरेर सरकारले नियन्त्रण गरेन भन्न मिल्छ ?,’ उनले प्रश्न गरे ।