निषेधाज्ञामा पनि कोरोना संक्रमण बढेकाे बढ्यै

A+ A A-

कोरोना भाइरस (कोभिड–१९) नियन्त्रण गर्न सरकारले काठमाडौं उपत्यकामा ३ भदौदेखि निषेधाज्ञा जारी गरेको छ । तर, निषेधाज्ञाको समयमा कोरोना संक्रमितको संख्या ह्वात्तै बढेको छ ।

इपिडिमियोलोजी तथा सरुवा रोग नियन्त्रण महाशाखाका अनुसार, काठमाडौंमा ६ हजार ६ सय २४, भक्तपुरमा ७ सय ११ र ललितपुरमा ९ सय १९ जना गरी कुल ८ हजार २ सय ५४ संक्रमित संख्या पुगेको छ ।

३ भदौदेखि २१ भदौसम्म मात्र ५ हजार ९ सय १५ संक्रमित थपिएका हुन् ।

३ भदौदेखि २१ सम्मको तथ्यांक

३ भदौ– १ सय ५९
४ भदौ– २ सय
५ भदौ– १ सय ८२
६ भदौ– २ सय १६
७ भदौ– १ सय ६६
८ भदौ– २ सय २४
९ भदौ– २ सय ३२
१० भदौ– ३ सय १
११ भदौ– ३ सय ७७
१२ भदौ– ४ सय १५
१३ भदौ– १ सय ८६
१४ भदौ– ४ सय २९
१५ भदौ– २ सय ९८
१६ भदौ– ४ सय ८१
१७ भदौ– ३ सय ८८
१८ भदौ– ४ सय ४५
१९ भदौ– ४ सय ५४
२० भदौ– ४ सय ८
२१ भदौ– ३ सय ५४

निषेधाज्ञाभन्दा पहिले नै संक्रमित

सरकारको (कोभिड–१९) फोकल पर्सन डा. महेन्द्र श्रेष्ठले निषेधाज्ञा भन्दा पहिले नै संक्रमण फैलिएको बताए । ‘निषेधाज्ञा भएपछि बढेको होइन । त्योभन्दा अगाडि नै फैलिएको थियो । संक्रमण फैलिएपछि नियन्त्रण गर्न निषेधाज्ञा गरिएको हो,’ उनले भने ।

जे उद्देश्यले निषेधाज्ञा गरिएको हो, त्यो पूर्ण रूपमा सफल हुन नसकेको डा श्रेष्ठ बताउँछन् । ‘नियन्त्रणका लागि मान्छे घर भित्रै बसून् । एउटा समुदायबाट अर्को समुदायमा नजाओस् भन्ने हो । त्याे पूर्ण रूपमा सफल भएन । ‘नागरिकलाई सहज बनाउन खोज्दा पाटनमा भीड भयो, केही समयअगाडि इनफ इज इनफको आन्दोलन भयो,’ उनले भने, ‘१५ वटा गाउँका मान्छे भेला भएको हुन्छ । यसरी उपत्यकामा कोरोना फैलिएको हो ।’

खुला सीमा र कन्ट्याक्ट ट्रेसिङ बढेकाले पनि संक्रमितको संख्या बढेको उनले बताए । ‘खुला सीमा छ । कहाँबाट आउँछन् कहाँबाट । पछिल्लो समय कन्ट्याक्ट ट्रेसिङ पनि बढेको छ,’ डा. श्रेष्ठले भने ।

डा. श्रेष्ठले निषेधाज्ञा जारी नगरेको भए प्रत्येक दिन २ हजारभन्दा बढी संक्रमित पुग्ने दाबी गर्छन् ।

‘निषेधाज्ञा जारी नगरेको भए हरेक दिन २ हजारमाथि संक्रमित हुन्थे,’ उनले भने, निषेधाज्ञाले संक्रमण धेरै फैलिन पाएको छैन ।’

उनका अनुसार, निषेधाज्ञाको समयमा अस्पताल र आइसोलेसनको व्यवस्थापन गरिएको छ । अस्पताल र आइसोलेसनको पनि व्यवस्थापन गरिएको छ । उपत्यकमा ३ हजार आइसोलेन बेड छन् । आईसीयू भरिन लागेको छ । संक्रमितले बेड पाउन मुस्किल भएकाे छ ।

कहाँ चुक्यो त सरकार ?

जनस्वास्थ्य विज्ञहरूले कोरोना नियन्त्रण र रोकथामका लागि सरकार चुकेको बताउँछन् । ‘संक्रमितको सम्पर्कमा रहेकाको पनि खोजबिन भएकाले संक्रमितको संख्या बढेको हुन सक्छ,’ इपिडिमियोलोजी तथा सरुवा रोग नियन्त्रण महाशाखाका पूर्वनिर्देशक डा. बाबुराम मरासिनीले भने, ‘कसरी बढे संक्रमित ? कहाँबाट फैलियो भन्नेबारे सरकारले अनुसन्धान गर्नुपर्ने हो । त्यो भएको छैन ।’

सरकारी कार्यालय, अस्पताल, कोठामा कोचिएर धेरै जना बसेकाले संक्रमण फैलिएको हुन सक्ने उनी बताउँछन् । ‘जहाँ भीड, त्यहाँ कोरोना हो । एउटै कोठामा धेरै जना बसेका हुन्छन् । अर्को अस्पताल र सरकारी कार्यालयबाट पनि फैलिएको छ,’ उनले भने, ‘कहाँबाट फैलिएको हो, त्यो अनुसन्धान नगरी नियन्त्रण गर्न गाह्रो हुन्छ ।’

टोलटोलमा संक्रमण

जनस्वास्थ्यविज्ञ डा. समीर दीक्षितले टोलटोलमा संक्रमण बढेको बताए । ‘परिवारमा एक जना संक्रमित भयो भने सबै सर्छ । अनि परिवारबाट बाहिर तरकारी किन्न जानै पर्‍यो । अस्पताल जानै पर्‍यो,’ उनले भने, सरकारी कार्यालय खुल्यो । सडक आन्दोलन भयो । हाम्रो चालचलन, बानी, व्यवहार र संस्कृतिले मान्छेको हेलमेल बढ्यो । त्यसैको परिणाम देखिएको हो ।

लकडाउनले मात्र संक्रमण नरोकिने उनले बताए । ‘संक्रमण लकडाउनबाट रोकिने होइन । लकडाउनको समयमा रोकिन्छ भन्नु नै गलत थियो । कोरोना कसैको कन्ट्रोलमा छैन । आफैँ नियन्त्रण हुँदै जाने हो,’ उनले भने, ‘जोखिम समूहलाई बचाउने हो । बाँकीले मास्क लगाउने र दूरी कायम गर्ने हो ।’ जहाँ संक्रमण छैन, त्यहाँ सेवा सुरु गर्नुपर्नेमा उनको जोड छ ।

प्रकाशित मिति: सोमबार, भदौ २२, २०७७ १२:५०