पहिलो महिनाको व्यापार : आयात १९ प्रतिशत घट्यो, ७८ करोडको निर्यात बढ्यो

A+ A A-

चालू आवको पहिलो महिना पनि मुलुकको आयात व्यापार घटेको छ । आर्थिक वर्ष २०७६/७७ को पहिलो महिनाको तुलनामा १९.६ प्रतिशतको आयात व्यापार घटेको भन्सार विभागको तथ्यांकले देखाएको छ ।

पछिल्लो महिनाको तुलनामा भने ११ प्रतिशले आयात व्यापार घटेको देखिएको छ । भन्सार विभागको तथ्यांकअनुसार चालू आवको पहिलो महिना ८६ अर्ब ८७ करोड रुपैयाँ सामान आयात भएको छ ।

आव २०७५/७६ बाट मासिक औसत १ खर्ब रुपैयाँ बढीको व्यापार हुँदै आएकोमा गत आर्थिक वर्षको चैत महिनापछि खर्ब रुपैयाँभन्दा पनि कमको आयात व्यापार भएको छ । कोरोना महामारीको असरको कारण गत आवको पछिल्लो ४ महिना ४५ प्रतिशतले आयात घटेको थियो ।

चैतपछि असारमा उल्लेखनीय ९६ अर्ब रुपैयाँ र चालू आर्थिक वर्षको पहिलो महिना अर्थात् साउनमा करिब ८७ अर्ब रुपैयाँको आयात भएको हो । ८७ अर्बको आयात हुँदा भन्सार राजस्व २२ अर्ब ८४ करोड रुपैयाँ रहेको छ । यसले आयातित सामानमा २५ प्रतिशतको भन्सार देखाउँछ ।

चैत महिनामा ८१ अर्ब ६१ करोडको आयात वैशाखमा जम्मा ४५ अर्ब ८४ करोड भएको थियो भने जेठमा ६२ अर्ब २० करोड भएको थियो ।

३ वर्षयताकै न्यून आयात

आव २०७४/७५ को तुलनामा आव २०७५/७६ को पहिलो महिनामा ५७ प्रतिशतले बढेको व्यापार त्यसयताका वर्षहरूमा घटेको देखिएको छ । आव २०७६/७७ को तुलनामा ५७ प्रतिशले व्यापार बढेको थियो ।

तर, गत आर्थिक वर्षको पहिलो महिनामा १२ प्रतिशतले घटेको आयात चालू वर्षको पहिलो महिनामा पुन : १९ प्रतिशतले घटेको छ । आव २०७५/७६ को साउनको तुलनामा चालू वर्षको साउनमा करिब ३५ अर्ब रुपैयाँको आयात घटेको छ । गत आर्थिक वर्षको तुलनामा २० अर्ब रुपैयाँको आयात घटेको छ ।

चैतदेखि निरन्तर आयात घट्दै गएको अवस्थामा साउनमा आयात परिणाम अपेक्षित भएको भन्सार विभागका महानिर्देशक सुमन दाहालले बताए । 'अहिले औसत व्यापारको तुलनामा ८० प्रतिशत व्यापार पुगेको छ, साउनको आयात परिणाम स्वाभाविक हो,' दाहालले भने ।

बढ्दो निर्यात

गत आर्थिक वर्षमा पहिलो ६ महिनासम्म नै ६० अर्ब रुपैयाँको निर्यात पुगेर पनि गत आर्थिक वर्षमा १ खर्बको निर्यात पुर्‍याउने लक्ष्य सरकारको पूरा हुन सकेन । वृद्धिदरको हिसाबले गत आर्थिक वर्षको पहिलो महिनादेखि नै निर्यातको परिणाम उल्लेखनीय बढेको थियो ।

पहिलो महिना मात्रै १२ प्रतिशतको आयात घट्दा २७ प्रतिशतले निर्यात बढेको थियो । जबकि, आर्थिक वर्ष २०७५/७६ मा ५७ प्रतिशतले आयात बढ्दा निर्यात वृद्धिदर ३ प्रतिशतको मात्रै रहेको थियो । कठिन परिस्थितिमा पनि चालू आर्थिक वर्षको पहिलो महिनामा निर्यात बढेको छ । भन्सार विभागको विवरणअनुसार पहिलो महिना करिब ९ प्रतिशतले निर्यात बढेको छ ।

साउनमा गत वर्षको सोही समयमा तुलनामा ७८ करोड रुपैयाँले निर्यात बढेको देखिएको छ । गत आवको पहिलो महिना २७ प्रतिशतको निर्यात वृद्धिदर कायम गर्दै ८ अर्ब ८३ करोडको निर्यात भएको थियो । चालू आवको पहिलो महिना करिब ९ प्रतिशतले वृद्धि भएर ९ अर्ब ६१ करोड रुपैयाँ पुगेको छ ।

प्रकाशित मिति: बिहीबार, भदौ ४, २०७७ ०२:५९