१ सातामा ३० अर्बको राजस्व, साउनमा ११ प्रतिशले कमी

A+ A A-

कोरोना महामारी र आर्थिक क्रियाकलापमा सुस्तता आए पनि चालू आर्थिक वर्षको पहिलो महिनाको राजस्व प्राप्ति लक्ष्यभन्दा बढी देखिएको ।

पछिल्लो १ सातामा मात्रै ३० अर्ब बढीको राजस्व प्राप्त गरेपछि पहिलो महिना सरकारले ६१ अर्ब ३७ करोड रुपैयाँको राजस्व प्राप्ति गरेको महालेखा नियन्त्रकको कार्यालयको तथ्यांक रहेको छ ।

२५ साउनसम्म सरकारले ३१ अर्ब रुपैयाँ मात्रै राजस्व उठाउन सकेको थियो । तर, गत आवमा उठ्न बाँकी भ्याट र अन्त:शुल्कको रकम प्राप्ति भएको कारण पनि पछिल्लो साता सरकारको राजस्व बढी देखिएको हो ।

राजस्वमा ठूलो प्रभाव पार्ने भन्सार राजस्व चालू आर्थिक वर्षको पहिलो महिना करिब १८ प्रतिशतले कमी आए पनि समग्र राजस्व प्राप्त भने ११ प्रतिशत न्यून रहेको छ ।

धेरै स्वदेशी उद्योग अहिले पनि बन्द अवस्थामा रहेकोमा सञ्चालन भएका उद्योगले समेत औसत ५० प्रतिशत मात्रै क्षमतामा सञ्चालन भएकोमा भ्याट र अन्त:शुल्क घट्ने अवस्थामा देखिएको छ । तर, साउनमा भ्याट र अन्त:शुल्क वापतको रकम भने केही बढी प्राप्ति भएको आन्तरिक राजस्व विभागले जनाएको छ ।

गत आवको पहिलो महिना सरकारले ६८ अर्ब रुपैयाँको राजस्व प्राप्ति गरेकोमा चालू आवकाे पहिलो महिना करिब ८ अर्ब रुपैयाँले न्यून भएको देखिएको छ ।

आर्थिक वर्ष २०७५/७६ को महिलो महिना पनि सरकारले ६१ अर्ब रुपैयाँको राजस्व उठान सकेको थियो ।

चैतयता सरकारको आयमा निरन्तर प्रभाव पर्दै आएको छ । गत चैतमा ४१ अर्बको राजस्व उठेकोमा वैशाखमा १६ अर्ब मात्रै राजस्व प्राप्ति भएको थियो । त्यस्तै, जेठमा ४४ अर्ब रुपैयाँको राजस्व प्राप्ति भएकोमा असार १ खर्ब ४६ अर्ब रुपैयाँ प्राप्ति भएको थियो । चालू आवको पहिलो महिना अर्थात् साउनमा ६१ अर्ब रुपैयाँ पुगेको हो ।

अर्थ मन्त्रालयले चालू आवको पहिलो महिना करिब साढे ५६ अर्ब रुपैयाँ राजस्व उठ्ने अनुमान गरेकाेमा त्योभन्दा करिब ५ अर्ब रुपैयाँ बढी राजस्व प्राप्ति गरेको छ । जसमा अन्य प्राप्तबाट मात्रै ८ अर्ब १२ करोड रुपैयाँको रकम रहेको छ । चालू वर्षको पहिलो महिनाको राजस्वमा करिब २३ अर्ब रुपैयाँको भन्सार राजस्व रहेको छ ।

आव २०७५/७६ मा वर्षभरमा १० अर्ब रुपैयाँको अन्य प्राप्ति भएको थियो भने त्यसभन्दा अघिल्ला आर्थिक वर्षमा नगन्य मात्रै यस्तो प्राप्त रहेको थियो । तर, चालू आवको पहिलो महिना नै ८ अर्ब बढीको अन्य प्राति दिएको छ । अन्य प्राप्तिलाई घटाउने हो भने गत वर्षको तुलनामा राजस्व करिब २२ प्रतिशले कमी आउने देखिएको छ ।

प्रकाशित मिति: बुधबार, भदौ ३, २०७७ १६:४१