ठूला करदाता कार्यालयले १ खर्ब ३६ अर्ब राजस्व उठायो, लकडाउन अवधिमा मात्रै ३४ अर्ब

ठूला करदाता कार्यालयले १ खर्ब ३६ अर्ब राजस्व उठायो, लकडाउन अवधिमा मात्रै ३४ अर्ब

A+ A A-

ठूला करदाता कार्यालयले लकडाउनको अवधिमा १० चैत २०७६ पछि २ असार २०७७ सम्मको अवधिमा ३४ अर्ब रुपैयाँभन्दा बढीको राजस्व उठाएको छ । कतिपय करदाताले राजस्व बुझाउन चाहेर पनि कर कार्यालयले लिन नमानेको गुनासो गरिरहेको अवस्थामा ठूला करदाता कार्यालयले यही समयमा ३४ अर्ब रुपैयाँभन्दा बढीको राजस्व उठाएको ठूला करदाता कार्यालय प्रमुख झलक अधिकारीले जानकारी गराए ।

९० प्रतिशत राजस्व साना करदाताबाट १० प्रतिशत राजस्व, त्यस्तै १० प्रतिशत ठूला करदाताबाट ९० प्रतिशत हाराहारीमा राजस्व उठ्ने गर्छ । ठूला करदाता कार्यालयको क्षेत्र ठूलो भएको भन्दै वर्तमान सरकारले ४० देखि ८० करोड रुपैयाँसम्मको कारोबार गर्ने करदाताको राजस्व मध्यमस्तरको करदाता कार्यालयमार्फत उठाउने गर्छ भने ८० करोडभन्दा बढी रकमको वार्षिक कारोबार गर्ने करदाताबाट ठूला करदाताले कर उठाउँछ । ४० करोडसम्मको राजस्व भने आन्तरिक राजस्व विभागबाट उठाउने गरिन्छ ।

१० चैतपछि नेपाल सरकारले ८५ अर्ब रुपैयाँबराबरको राजस्व उठाएको छ । जसमा साढे ३४ अर्ब रुपैयाँ ठूला करदाता कार्यालयले उठाएको छ भने ३० अर्ब रुपैयाँ भन्सार विभागअन्तर्गत भन्सार राजस्वबाट उठेको छ । ठूला करदाता कार्यालय र आन्तरिक राजस्व विभागले गरी ६५ अर्ब रुपैयाँ राजस्व उठेको छ भने आन्तरिक राजस्व विभाग, मध्यमस्तरको करदाता कार्यालय र अन्य निकायसहित गैरकरसमेत गरी २० अर्ब रुपैयाँको मात्रैको राजस्व उठेको देखिएको छ ।

ठूला करदाता कार्यालयले लकडाउनको अवधिमा उठाएको साढे ३४ अर्ब रुपैयाँ रकममध्ये करिब २२ अर्ब रुपैयाँ विगतदेखि रोकिएको एनसेलको लाभकरअन्तर्गतको रकम हो भने १२ अर्ब रुपैयाँ अन्य करदातहरूबाट आएको रकम हो । ठूला करदाता कार्यालय प्रमुख अधिकारीका अनुसार पछिल्लो ३ दिनमा ६ अर्ब ७१ करोड रुपैयाँको राजस्व उठेको छ भने मंगलबार मात्रै ८३ करोड रुपैयाँको राजस्व उठाएको छ ।

लकडाउनको कारणले गर्दा अपेक्षित राजस्व नउठे तापनि काठमाडौंका करदाताहरूले कर बुझाइरहेको अधिकारी बताउँछन् । 'विराटनगर, वीरगञ्जलगायत अन्य क्षेत्रबाट करदाता आएर कर बुझाउन सक्नुभएको छैन, काठमाडौंमा रहेका करदाताहरूले कर बुझाइ नै रहनुभएको छ' अधिकारीले शिलापत्रसँग भने ।

सरकाले चालू आर्थिक वर्षमा अन्तःशुल्क र भ्याटको तल्लो तहमा पठाउने रकमसहित ११ खर्ब १२ अर्ब रुपैयाँको राजस्व उठाउने लक्ष्य निर्धारण गरेको थियो । संशोधित लक्ष्यअनुसार ८ खर्ब २७ अर्ब रुपैयाँको यस्तो राजस्व उठ्ने अनुमान गरिएको छ ।

ठूला करदाता कार्यालयले २ खर्ब ३३ अर्बको लक्ष्य पाएकोमा मंगलबारसम्म लक्ष्यको ५९ प्रतिशत राजस्व उठाएको छ । राजस्व लक्ष्यमध्ये सबैभन्दा धेरै लक्ष्य भन्सार विभागले पाएको थियो । भन्सार विभागले ४ खर्ब ७३ अर्ब रुपैयाँको लक्ष्य पाएकोमा हालसम्म २ खर्ब ९१ अर्ब रुपैयाँको राजस्व भन्सार विभागले उठाएको छ ।

सरकारले सोमबारसम्म ६ खर्ब ४९ अर्ब रुपैयाँको राजस्व उठाएकोमा भन्सार विभागको योगदान ४४ प्रतिशत रहेको छ भने २१ प्रतिशत ठूला करदाता कार्यालयको योगदान छ ।

प्रकाशित मिति: मंगलबार, असार २, २०७७ १८:१०