स्तनपान गराउँदा आमाबाट शिशुमा कोरोना सर्दैन

A+ A A-

कोरोना भाइरस (कोभिड १९) का कारण सिन्धुपाल्चोककी २९ वर्षीया सुत्केरी महिलाको मृत्यु भयो । सुत्केरी महिलामा कोरोना पोजिटिभ देखिए पनि शिशुमा संक्रमण देखिएन । विश्वको तथ्यांक हेर्ने हो भने महिलामा भन्दा पुरुषमा धेरै संक्रमण देखिएको छ । नेपालमा पनि पुरुष संक्रमित धेरै छन् । तर, कोरोनाका कारण १ सुत्केरी महिलाको मृत्यु भयो ।

कस्तो अवस्थामा आमा र बच्चा दुवैमा संक्रमण देखिन्छ ? आमा संक्रमित भएमा शिशुलाई सर्छ कि सर्दैन ? शिशुलाई स्तनपान गर्न मिल्छ कि मिल्दैन ?

कोभिड– १९ नयाँ रोग भएकाले गर्भवती महिलालाई कस्तो असर पर्छ भन्ने विषयमा पनि अध्ययन अनुसन्धान भइरहेको छ ।

गर्भावस्थामा महिलाको प्रतिरक्षा प्रणालीमा विभिन्न परिवर्तन आउने भएकाले भने उच्च जोखिमा हुन सक्ने जनस्वास्थ्यका डाक्टरहरू बताउँछन् ।

‘सुत्केरी महिलामा इम्युनिटी पावर कम हुन्छ,’ डा. पदम सिम्खडाले भने,’ ‘इम्युनिटी पावर कम भएपछि छिटो असर गर्छ ।’ कोरोना भाइरसबाट संक्रमित भए पनि गर्भवती महिला र शिशु स्वस्थ भए मृत्युदर न्यून हुने विभिन्न अध्ययनले देखाएको छ ।

आमाबाट बच्चामा भाइरस सर्छ, तर जोखिम कम

आमाबाट शिशुमा भाइरस सर्छ वा सर्दैन भन्नेबारे अनुसन्धान भइरहेको छ । ‘आमाबाट बच्चामा भाइरस सर्न सक्छ । तर, नवजात शिशुमा जोखिम भने कम हुन्छ,’ डा. सिम्खडाले भने । चीनमा ३८ जना गर्भवती महिलामा गरिएको अध्ययनले कोभिड १९ ले गर्दा मातृ मृत्युदर नदेखिएको उनले बताए ।

‘चीनको अध्ययनले मातृ मृत्युदर देखिएन,’ उनले भने, ‘संक्रमित आमाबाट शिशुमा रोग सर्ने कुनै पनि प्रमाण भेटिएन ।’

स्तनपान गराउँदा सर्दैन

युनिसेफले प्रकाशन गरेकाे तथ्याङ्कअनुसार अहिलेसम्म स्तनपान गराउँदा शिशुमा कोभिड– १९ सरेको छैन । साथै, चीनमा ६ जना महिलाको पहिलो स्तनपानलाई परीक्षण गर्दा कोभिड– १९ नेगेटिभ पाइएको छ ।

कसरी सुरक्षित राख्ने गर्भवती महिलालाई ?

आममानिसले आफूलाई कोभिड १९ बाट जसरी सुरक्षित राख्छन्, गर्भवती महिलाले पनि आफूलाई त्यसरी नै सुरक्षित राख्ने हो । सामाजिक दूरी कायम गर्ने, बाहिरफेराे निस्केर फर्केपछि साबुनपानीले हात धुने, खोक्दा र हाछ्यूँ गर्दा मुख र नाक छोप्ने गनुपर्छ ।

झोलिलो पदार्थ पिउने

गर्भवती महिलाले झोलिलो पदार्थ धेरै पिउनुपर्छ । आफू र बच्चालाई स्वस्थ राख्न त्यस्ताे खानेकुराले मद्दत गर्छ । स्वस्थ र सन्तुलित खाना खाने, भीडभाडमा नजाने र पारिवारिक जमघट नगर्ने ।

घरमै स्वास्थ्यकर्मीको सहायताले बच्चा जन्माउने

डाक्टरहरूका अनुसार स्वास्थ्यकर्मीको सहायताले सम्भव भएसम्म घरमै बच्चा जन्माउँदा उपयुक्त हुन्छ । अस्पताल जाँदा अरुबाट सर्न सक्ने भएकाले घरमै बच्चा जन्माउँदा काेराेना संक्रमणकाे जोखिम कम हुन्छ । यदि नियमित परीक्षणका लागि अस्पताल जानुपर्‍याे भने पनि विशेष सावधानी अपनाउने ।

कोरोना संक्रमित भए आमा र शिशुको हेरचाह कसरी गर्ने ?

गर्भावस्थावा सुत्केरी अवस्थामा कोरोना संक्रमण भएमा सबै स्याहार सुसार पाउने अधिकार रहेको डब्लूएचओले जनाएको छ ।

साथै, महिलाले सुरक्षित र सकारात्मक प्रसवको अनुभव गर्न पाउनुपर्ने, आदर र सम्मानपूर्ण व्यवहार गर्नुपर्ने डब्लूएचओले उल्लेख गरेको छ ।

आमाको दूधमा शिशुलाई आवश्यक सम्पूर्ण पोषक तत्त्वहरू सही मात्रामा हुने र त्यसले बच्चामा रोग प्रतिरोधात्मक क्षमताको विकास गर्ने भएकाले संक्रमित भए पनि आमाले दूध चुसाउनुपर्दछ ।

प्रकाशित मिति: सोमबार, जेठ ५, २०७७ १८:०६