मेस्सीले जिते कीर्तिमानी छैटौं बालोन डी’ओर अवार्ड

A+ A A-

अर्जेन्टिना तथा स्पेनिस क्लब बार्सिलोनाका कप्तान लियोनल मेस्सीले कीर्तिमानी छैटौं पटक बालोन डी’ओर अवार्ड जितेका छन् । गएराति घोषणा गरिएको अवार्ड जित्दै मेस्सीले आफूलाई सर्वकालिक सर्वाधिक बालोन डी’ओर जित्ने खेलाडीमा उभ्याउन सफल भए ।

बालोन डी’ओर फ्रान्स फुटबल म्यागजिनले वर्षको उत्कृष्ट फुटबलरलाई प्रदान गर्ने अवार्ड हो । ३२ वर्षीय मेस्सीले सन् २०१५ यता पहिलो पटक यो अवार्ड जितेका हुन् । गत वर्ष बालोन डी’ओर क्रोएसिया तथा स्पेनकै रियल मड्रिडका खेलाडी लुका मोड्रिचले जितेका थिए ।

मेस्सीले गत सिजन (२०१८–२०१९) मा क्लब र राष्ट्रिय टिमबाट गरी ५४ गोल गरेका थिए । उनले अर्जेन्टिनालाई कोपा अमेरिकामा तेस्रो स्थान दिलाएका थिए भने बार्सिलोनालाई च्याम्पियन्स लिगको सेमिफाइनलसम्म पुर्याएका थिए ।

खेलाडी, प्रशिक्षक तथा पत्रकारको मतका आधारमा प्रदान गरिने अवार्डमा युरोपियन च्याम्पियन्स लिग विजेता लिभरपुलका भर्जिल भान डिजेक दोस्रो भए । युरोपियन वर्ष खेलाडीको उपाधि जितेका भर्जिललाई यो पटक बालोन डी’ओरको समेत दाबेदार मानिएको थियो ।

तर अवार्ड मेस्सीले जितेका हुन् । पाँच पटकका विजेता युभेन्टस तथा पोर्चुगलका क्रिष्टियानो रोनाल्डो तेस्रो भए । लिभरपुलका गोलरक्षक एलिसनले याशिन ट्रफी हात पारेका छन् । बालोन डी’ओर विजेता एकमात्र गोलरक्षक याशिनको नाममा यो अवार्ड यसै वर्षदेखि प्रदान गर्न थालिएको हो ।

युभेन्टस तथा नेदरल्याण्डसका डिफेन्डर माथेज डी लिग्टले कोपा ट्रफी जितेका छन् । उनलाई बालोन डी’ओरका पूर्वविजेताहरुले चयन गरेका हुन् । यो ट्रफी २१ वर्षमुनिका उत्कृष्ट खेलाडीलाई प्रदान गर्ने गरिएको छ ।

पछिल्लो ११ वर्षदेखि ला लिगाका खेलाडीले मात्र बालोन डी’ओर जितेका छन् । जसमध्ये १० पटक मेस्सी र रोनाल्डोले मात्रै यो अवार्ड हात पार्दा लुका मोड्रिचले गत वर्ष अवार्ड जितेका थिए ।

प्रकाशित मिति: मंगलबार, मंसिर १७, २०७६ ०७:१८